Story

LIGI KUU YA NBC KUHITIMISHWA LEO.

Ligi Kuu ya NBC inafika tamati Leo Mei 28 kwa michezo nane ikihusisha timu zote 16 Zinazoshiriki Ligi Kuu ya NBC kupigwa kuanzia saa 10:00 alasiri kwenye mikoa saba tofauti.

Michezo ya leo itaamua hatma ya baadhi ya timu ikiwemo vita ya nafasi ya pili, nani kushuka daraja, nani kucheza mtoano (Playoff) na vita ya ufungaji bora.

Nafasi ya pili inapambaniwa na Timu za Azam na Simba ambapo Azam Ina alama 66 kwenye michezo 29 sawa Simba wakitofautiana kwenye mabao ya kufunga na kufungwa ambapo Azam akiwa na utofauti mkubwa wa mabao (40) kuizidi Simba (32).

Anayeshika nafasi ya pili kwenye Ligi Kuu ya NBC anapata nafasi ya kuiwakilisha Nchi kwenye michuano ya Klabu Bingwa barani Afrika.

Vita ya kushuka daraja na Kuungana na Mtibwa Sugar iliyotangualia Ligi ya NBC ya Championship ipo mikononi mwa Geita Gold na Tabora United ambapo Geita ikiwa na alama 25 huku Tabora United ikiwa na alama 27.

Geita inahitaji ushindi na kuomba Tabora ipoteze ili kufikisha alama 28 ambazo zitaipa nafasi ya kushiriki hatua ya mtoano (Playoff) , Tabora inahitaji ushindi ili kujihakikishia nafasi ya kucheza mtoano (Playoff).

Kila nafasi ambayo timu itamaliza kwenye Ligi Kuu ya NBC ina zawadi ya fedha kutoka kwa mdhamini mwenye haki ya matangazo ya Ligi Kuu ya NBC Azam Tv.

Back to news